Ministri Nikoloski u takua me ambasadorin e ri turk në Shkup

Zëvendëskryeministri dhe ministri i Transportit i Maqedonisë së Veriut, Aleksandar Nikolloski, është takuar me ambasadorin e sapoemëruar të Turqisë, Alper Aktas, me ç’rast janë shqyrtuar marrëdhëniet dypalëshe mes dy vendeve dhe mundësitë për thellimin e bashkëpunimit të ndërsjellë, transmeton Anadolu.

Sipas një njoftimi nga Ministria e Transportit, theks i veçantë i është kushtuar shkëmbimit tregtar dhe bashkëpunimit ekonomik, veçanërisht në fushën e politikave të transportit dhe lidhjes infrastrukturore.

Gjatë takimit, ministri Nikolloski ka prezantuar politikat zhvillimore të Qeverisë dhe planet për përmirësimin e lidhshmërisë infrastrukturore në rajon. Nikolloski ka theksuar se Maqedonia e Veriut është destinacion i favorshëm për investime dhe portë për lidhjen me Evropën Qendrore.

Në këtë drejtim, është vënë në dukje se prania e një numri të madh të kompanive turke që investojnë në vend dëshmon për marrëdhëniet miqësore mes dy shteteve si dhe për potencialin për thellimin e mëtejshëm të partneritetit ekonomik.

Bashkëbiseduesit kanë konfirmuar rëndësinë e vazhdimit të bashkëpunimit mes Maqedonisë së Veriut dhe Turqisë në disa fusha, me theks të veçantë te ekonomia, lidhja mes qytetarëve dhe zhvillimi i turizmit.

Sa i përket turizmit, është theksuar se ekzistojnë potenciale të mëdha për ndërlidhjen e dy vendeve, me qëllim nxitjen e vizitave turistike dhe thellimin e lidhjeve të ndërsjella.

Siç thuhet në njoftim, takimi paraqet një mundësi për forcimin e partneritetit mes Maqedonisë së Veriut dhe Turqisë, në interes të zhvillimit ekonomik, investimeve të reja dhe avancimit të marrëdhënieve të përgjithshme dypalëshe.