,Presidenti i Serbisë paralajmëroi se konfliktet globale mund të përfundojnë me përdorimin e armëve
"Me kriza të mëdha ekonomike vijnë probleme politike, dhe kjo shumë lehtë do të çojë në luftëra. Dhe besoj se këto konflikte në fund do të përfundojnë me përdorimin e armëve bërthamore", tha Aleksandar Vuçiq
Presidenti i Serbisë, Aleksandar Vuçiq, deklaroi se "jetojmë në një kohë ndryshimesh tektonike" që kërkojnë seriozitet dhe përkushtim, duke theksuar se situata botërore do të bëhet edhe më e ndërlikuar, duke paralajmëruar se, sipas mendimit të tij, konfliktet globale mund të përfundojnë me përdorimin e armëve bërthamore, raporton Anadolu.
"Bota po ndryshon dhe para nesh janë sfida serioze. Pres që konfliktet të përshkallëzohen dhe besoj se në fund do të rezultojnë me përdorimin e armëve bërthamore. Jo sepse e dua, por sepse po përballemi me probleme të thella, strukturore dhe ekonomike që do të çojnë në pasoja katastrofike", tha Vuçiq në një miting parazgjedhor në Kula.
Presidenti serb paralajmëroi për tensionet në rritje në botë, veçanërisht në lidhje me Lindjen e Mesme, dhe theksoi se kjo mund të çojë në konflikte serioze. Ai gjithashtu kujtoi ndryshimet shqetësuese ekonomike globale, përfshirë rritjen e çmimeve të naftës, të cilat nuk janë të zakonshme në kohë të qëndrueshme.
"Këto ndryshime sjellin tronditje të paparashikueshme. Duhet të përgatitemi, sepse me kriza të mëdha ekonomike vijnë probleme politike, dhe kjo shumë lehtë do të çojë në luftëra. Dhe besoj se këto konflikte në fund do të përfundojnë me përdorimin e armëve bërthamore", theksoi Vuçiq.
Vuçiq gjithashtu u bëri thirrje qytetarëve të jenë të kujdesshëm dhe të përgjegjshëm, duke theksuar se Serbia duhet të ruajë paqen dhe stabilitetin. "Duhet të mbrojmë vendin tonë, fëmijët tanë dhe familjet tona. Askush nuk mund të garantojë se bota do të mbetet e qetë, madje as ata që tani mendojnë se janë në siguri", tha Vuçiq, duke theksuar se Serbia duhet të mbetet neutrale dhe e pavarur në përballjen me sfidat globale.
Në kontekstin e zgjedhjeve lokale të ardhshme, të cilat do të mbahen më 29 mars, Vuçiq u bëri thirrje qytetarëve të mendojnë se si duan ta formësojnë të ardhmen e tyre dhe të marrin vendime të përgjegjshme përballë ndryshimeve të mëdha globale.
