Kosova dhBelgjika nënshkruajnë marrëveshje për eliminimin e tatimit të dyfishtë
Ministri Murati theksoi se marrëveshja krijon kushte më të favorshme për investime dhe lehtëson veprimtarinë e bizneseve në të dy vendet
Republika e Kosovës dhe Mbretëria e Belgjikës kanë nënshkruar marrëveshje për eliminimin e tatimit të dyfishtë, transmeton Anadolu.
Marrëveshja për Eliminimin e Tatimit të Dyfishtë në lidhje me Tatimet mbi të Ardhurat dhe Kapitalin, si dhe për Parandalimin e Evazionit dhe Shmangies Tatimore u nënshkrua në margjinat e Takimeve Pranverore në Washington DC, midis ministrit të Financave të Kosovës, Hekuran Murati dhe zëvendëskryeministrit njëherësh ministër i Financave i Mbretërisë së Belgjikës, Jan Jambon.
Ministri Murati theksoi se marrëveshja krijon kushte më të favorshme për investime dhe lehtëson veprimtarinë e bizneseve në të dy vendet.
Ndërkaq, ministri Jambon vlerësoi bashkëpunimin me Kosovën dhe rikonfirmoi mbështetjen e vazhdueshme të Belgjikës në proceset integruese të Kosovës.
“Kjo marrëveshje forcon tutje partneritetin ekonomik ndërmjet Kosovës dhe Belgjikës dhe dëshmon angazhimin e përbashkët për thellimin e bashkëpunimit bilateral”, thuhet në njoftimin e Ministrisë së Financave.
Gjatë kësaj jave, ministri Murati po qëndron në Washington DC, ku po merr pjesë në Takimet Pranverore të organizuara nga Banka Botërore dhe Fondi Monetar Ndërkombëtar.
