Siljanovska-Davkova:Marrëdhëniet Maqedoni e Veriut-Shqipëri, të shkëlqyera dhe miqësore, nuk kemi çe
"Marrëdhëniet midis vendit tonë dhe Shqipërisë janë të shkëlqyera dhe miqësore, nuk kemi çështje të hapura", tha presidentja e Maqedonisë së Veriut, Gordana Siljanovska-Davkova sot në një konferencë për media me homologun Begaj
Bilateralizimi i integrimit evropian nuk do të jetë një shembull i izoluar dhe anëtarët e Bashkimit Evropian (BE) duhet ta parandalojnë atë, deklaroi sot presidentja e Maqedonisë së Veriut, Gordana Siljanovska-Davkova në një konferencë të përbashkët për mediat me homologun e saj shqiptar Bajram Begaj, i cili ndodhet në një vizitë zyrtare në vend, transmeton Anadolu.
Presidentja Siljanovska-Davkova përsëriti se janë të përkushtuar fuqimisht ndaj anëtarësimit në BE dhe theksoi se i sheh hapat e ndërmarrë nga Mali i Zi dhe Shqipëria në rrugën drejt BE-së si hapa evropianë për të gjithë Ballkanin Perëndimor.
"Anëtarësimi arrihet nëpërmjet reformave, veçanërisht sundimit të ligjit, luftës kundër korrupsionit dhe forcimit të institucioneve demokratike. Dhe këtu kemi një konsensus se kjo është diçka që nuk lidhet vetëm me kriteret e Kopenhagenit, por edhe me evropianizimin tonë", tha Siljanovska-Davkova.
Ajo theksoi se bilateralizimi i integrimit evropian nuk do të jetë një shembull i izoluar dhe se vendet anëtare të BE-së duhet ta marrin seriozisht dhe ta parandalojnë atë.
"Vendosja në agjendë e çështjeve të identitetit dhe historisë vetëm sa do ta ndërlikojë procesin e pranimit të vendeve që natyrshëm i përkasin BE-së", tha Siljanovska-Davkova.
Presidentja maqedonase vlerësoi se marrëdhëniet midis Maqedonisë së Veriut dhe Shqipërisë janë të shkëlqyera dhe miqësore, duke theksuar se, "nuk kemi çështje të hapura dhe kemi një bazë për thellimin e bashkëpunimit në të gjitha fushat".
"Takimi i sotëm është për mua një nxitje për bashkëpunim më intensiv dypalësh dhe është një kontribut tjetër në thellimin e miqësisë dhe mbështetjes së ndërsjellë", tha ajo.
