Presidenti Erdogan pritet me ceremoni në Seul nga homologu i Koresë së Jugut

Presidenti i Turqisë, Recep Tayyip Erdogan, u prit të martën në Seul me një ceremoni nga Presidenti i Koresë së Jugut, Lee Jae-myung, transmeton Anadolu.

Presidenti Erdogan dhe Zonja e Parë, Emine Erdogan, u pritën nga Presidenti Lee dhe bashkëshortja e tij pas mbërritjes në pallatin presidencial.

Më pas, Erdogan dhe Lee prezantuan anëtarët e delegacioneve të tyre përkatëse.

Pas ceremonisë, dy liderët zhvilluan një takim kokë më kokë.

Në ceremoni morën pjesë gjithashtu ministri i Punëve të Jashtme i Turqisë, Hakan Fidan, ministri i Energjisë dhe Burimeve Natyrore, Alparslan Bayraktar, ministri i Mbrojtjes Kombëtare, Yasar Guler, drejtori i Komunikimit, Burhanettin Duran, si dhe zyrtarë të tjerë.

Erdogan e ka identifikuar Korenë e Jugut si një partner të mundshëm kyç për centralin e dytë bërthamor që Turqia planifikon të ndërtojë në Sinop, në bregdetin e Detit të Zi.

Në një intervistë për agjencinë e lajmeve Yonhap, dhënë para vizitës, Erdogan deklaroi se vizita synon të forcojë dialogun politik dhe t'u japë një hov të ri marrëdhënieve ekonomike midis dy vendeve.

"Ne e shohim Republikën e Koresë si një bashkëpunëtor me potencial të madh në këtë nismë," tha Erdogan.

Sipas Duran, dy presidentët pritet të diskutojnë të gjitha aspektet e partneritetit strategjik midis Ankarasë dhe Seulit, si dhe çështjet aktuale rajonale dhe globale.

Ai shtoi se gjatë vizitës, e cila zhvillohet nga 1 deri më 4 nëntor, pritet të nënshkruhen edhe dokumente të ndryshme që synojnë forcimin e kornizës ligjore të marrëdhënieve dypalëshe.