Presidenti Begaj: Shqipëria është një model suksesi në kundërvënien ndaj terrorizmit

Presidenti i Shqipërisë, Bajram Begaj ka deklaruar se Shqipëria është një model suksesi në kundërvënien ndaj terrorizmit dhe parandalimin e ekstremizmit të dhunshëm.

Sipas njoftimit nga Presidenca e Shqipërisë, gjatë fjalës së tij në samitin "The Aqaba Process Balkans Forum III", që u mbajt në Sofje të Bullgarisë, Begaj rikonfirmoi qëndrimin e Shqipërisë si pjesë e Aleancës Globale dhe e platformave kundër terrorizmit.

Gjithashtu thuhet se Begaj theksoi rëndësinë e përgjegjësisë, solidaritetit dhe angazhimit të përbashkët përballë çdo kërcënimi dhe sfide.

"Terrorizmi nuk njeh kufij, kombësi, fe apo përkatësi etnike. Ai është një kërcënim i përbashkët dhe kërkon një përgjigje të përbashkët. Ne besojmë se paqja dhe siguria afatgjatë arrihen vetëm përmes bashkëpunimit rajonal e ndërkombëtar dhe përgjegjësisë së përbashkët", tha Begaj.

Sipas presidentit Begaj, Shqipëria është një partner rajonal dhe global i besueshëm, "me një kontribut të qenësishëm në luftën kundër ekstremizmit të dhunshëm dhe terrorizmit".

"Përmes Qendrës së Koordinimit Kundër Ekstremizmit të Dhunshëm, Shqipëria është transformuar në një model ekspertize rajonale. Praktika jonë për parandalimin, rehabilitimin, riintegrimin, risocializimin dhe mosangazhimin është njohur ndërkombëtarisht si praktikë e mirë nga partnerët tanë strategjikë", ka deklaruar Begaj.

Samiti bashkëorganizohet nga presidenti i Bullgarisë, Rumen Radev dhe Mbreti i Jordanisë, Abdullah II dhe ka në fokus çështjet e sigurisë në Ballkan.