Partia për Unitet të Madh nga Turqia organizon program iftari në Maqedoninë e Veriut
"Fakti që marrëdhëniet e Turqisë me Maqedoninë e Veriut, me Kosovën dhe me Bosnje e Hercegovinën janë në këtë nivel kaq të lartë është i rëndësishëm dhe i çmuar si për paqen dhe sigurinë tuaj këtu, ashtu edhe për sigurinë", tha Destici
Kryetari i Përgjithshëm i Partisë për Unitet të Madh (BBP), Mustafa Destici, dha mesazh uniteti në një program iftari në kryeqytetin e Maqedonisë së Veriut, Shkup, raporton Anadolu.
Në fjalimin e tij në programin e iftarit të partisë së tij në Shkup, Destici theksoi se turqit, kudo që ndodhen në botë dhe nën cilindo flamur shteti që jetojnë, janë në vendin më të veçantë të gjeografisë së zemrës së tyre.
Ai shprehu kënaqësinë për marrëdhëniet mes Turqisë dhe vendeve të Ballkanit. "Fakti që marrëdhëniet e Turqisë me Maqedoninë e Veriut, me Kosovën dhe me Bosnje e Hercegovinën janë në këtë nivel kaq të lartë është i rëndësishëm dhe i çmuar si për paqen dhe sigurinë tuaj këtu, ashtu edhe për sigurinë, paqen dhe zhvillimin e vetë vendeve të Ballkanit", tha ai.
Duke folur për sulmet e SHBA-së dhe Izraelit ndaj Iranit, Destici reagoi ndaj bombardimit të shkollës së vajzave në Iran.
"Prej dyzet vitesh luftojmë kundër organizatës terroriste PKK. Kemi dhënë dhjetëra mijëra dëshmorë dhe humbje. Por të vrasim një civil apo t'i bëjmë dëm një komuniteti civil nuk na ka shkuar kurrë në mendje. Sepse në kërkesat e besimit tonë, identitetit tonë, kombësisë sonë turke dhe fesë myslimane kjo nuk ekziston. Prandaj duhet t'i dalim më shumë zot njëri-tjetrit dhe ta vlerësojmë më shumë njëri-tjetrin", vazhdoi ai.
Destici tha gjithashtu se janë mirënjohës për të drejtat që qeveria e Maqedonisë së Veriut u ka dhënë turqve kohët e fundit dhe vazhdoi.
"Edhe ne këtu jemi në anën e paqes shoqërore. Por a nuk ka ende të drejta që u mungojnë bashkëkombësve tanë turq këtu? Sigurisht që ka. Ndërsa ju luftoni këtu për t'i fituar ato, sigurisht që edhe ne si Turqi dhe si komb turk jemi deri në fund në anën tuaj në këtë luftë. Në të njëjtën mënyrë, sa i përket marrëdhënieve mes Turqisë dhe komunitetit turk në Maqedoninë e Veriut, Partia për Unitet të Madh dhe rrjedhimisht Aleanca Popullore janë në shërbimin tuaj. Falë Zotit, arrijmë në çdo pikë ku duhet të arrijmë dhe në zgjidhjen e kërkesave dhe problemeve tuaja nuk do të hezitojmë kurrë e për asnjë arsye të vëmë dorën nën gur", theksoi Destici.
