Ministri i Jashtëm i Maqedonisë së Veriut Mucunski takon homologun amerikan Rubio
Takimi është zhvilluar në margjina të takimit të ministrave të jashtëm të vendeve anëtare të NATO-s
Ministri i Jashtëm i Maqedonisë së Veriut, Timço Mucunski, është takuar në Bruksel me Sekretarin e Shtetit të SHBA-së, Marco Rubio.
Takimi është zhvilluar në margjina të takimit të ministrave të jashtëm të vendeve anëtare të NATO-s.
Siç njoftoi Mucunski nëpërmjet një deklarate në llogarinë e tij në rrjetet sociale, dy kryediplomatët kanë diskutuar bashkëpunimin dypalësh dhe prioritetet e përbashkëta brenda NATO-s.
Ai tha po ashtu se është riafirmuar angazhimi për forcimin e dialogut politik dhe nisjen e nismave të reja.
“Shumë nisma të përbashkëta janë përpara nesh”, ka shkruar Mucunski.
Ndryshe, sot në Bruksel mbahet takimi i ministrave të jashtëm të NATO-s, përpara samitit të NATO-s në qershor, që pritet të vendosë terrenin për koordinimin e mëtejshëm të politikave midis vendeve anëtare.
Burimet thonë se takimi, që shënon konsultimin e parë kolektiv midis administratës së re të SHBA-së dhe aleatëve të NATO-s, do të mbulojë një sërë çështjesh sigurie, duke përfshirë mbrojtjen kolektive, luftën në Ukrainë dhe bashkëpunimin e NATO-s me partnerët e saj në Azi-Paqësor.
