Presidenti Erdoğan shënon Ditën e Përkujtimit të Ataturkut dhe Ditën e Rinisë dhe Sporteve

Presidenti turk, Recep Tayyip Erdoğan, me anë të një mesazhi shënoi Ditën e Përkujtimit të Ataturkut dhe Ditën e Rinisë dhe Sporteve, transmeton Anadolu.

Në një mesazh të ndarë nga Kryesia e Komunikimeve të Turqisë në X, Erdoğan nënvizoi rëndësinë historike të 19 majit, që shënon fillimin e Luftës Turke për Pavarësi të udhëhequr nga Mustafa Kemal Ataturk, themeluesi i Republikës Turke, në vitin 1919.

"Ne po mbrojmë atdheun dhe Republikën, trashëgimi të shenjta që na janë besuar nga paraardhësit tanë dhe po ndërmarrim hapa për të çuar përpara dhe lartësuar Republikën e Turqisë, e cila do të zgjasë përgjithmonë, në çdo fushë", theksoi presidenti turk.

Erdoğan theksoi se i sheh të rinjtë turq jo vetëm si arkitektët e së ardhmes, por edhe si forcë lëvizëse të ndryshimit, duke thënë se ai "vërtet" beson se me energjinë, vendosmërinë dhe ëndrrat e tyre, duke mbajtur trashëgiminë e "qytetërimit tonë në zemrat e tyre", të rinjtë turq do të lënë gjurmë përcaktuese "në epokën tonë si 'Shekulli i Turqisë'".

"Në ndërtimin e së ardhmes së Turqisë, ne zgjidhim dhe eliminojmë përgjithmonë çdo problem që do të shpërdorojë energjinë e të rinjve turq dhe burimet e vendit me diskutime të pafrytshme", tha ai.

"Ne punojmë me gjithë fuqinë tonë për të përmbushur premtimin tonë për t'u lënë të rinjve tanë një vend paqësor, të qetë, me teknologji të lartë dhe të begattë", u shpreh Erdoğan.

"Ne u ofrojmë të rinjve tanë mundësi për të zbuluar potencialin e tyre në çdo fushë, nga shkenca te arti, nga sporti te bujqësia, nga diplomacia te teknologjitë bërthamore dhe ecim dorë për dore e krah për krah me të rinjtë tanë për të realizuar idealin tonë për një Turqi të madhe dhe të fuqishme", vuri në dukje presidenti turk.

Ai tha se do të vazhdojnë të mbështesin të gjithë të rinjtë turq që punojnë pa u lodhur për të arritur qëllimet e tyre, nuk dorëzohen kurrë dhe duan të lavdërojnë më tej trashëgiminë qytetëruese që trashëguan nga paraardhësit e tyre.

Presidenti turk deklaroi se ata do të ruajnë gjithmonë vendosmërinë e tyre për të punuar më shumë dhe për të arritur më shumë për të rinjtë turq, duke i vlerësuar ata për çdo sukses të Turqisë, "e cila është bërë vend qendror ndërsa forcohet dhe ka forcuar pozicionin e saj me hapat që kemi ndërmarrë".

Erdoğan përkujtoi gjithashtu "të gjithë heronjtë e Luftës sonë të Pavarësisë, në veçanti Gazi Mustafa Kemalin".

19 maji i vitit 1919 ishte dita kur Mustafa Kemal Ataturk, më vonë themelues i Republikës së Turqisë, mbërriti në qytetin Samsun të Detit të Zi nga Stambolli për të nisur luftën që katër vjet më vonë e transformoi kombin në Turqinë moderne.

Në vitin 1938, Ataturku ia kushtoi 19 majin të rinjve të kombit turk si Ditën e Rinisë dhe Sportit - një festë kombëtare që i bën të rinjtë të marrin pjesë në aktivitete sportive dhe kulturore me ceremoni zyrtare në të gjithë vendin.