Izraeli pranon rihapjen e kufizuar të kalimit kufitar në Rafah

Zyra e kryeministrit izraelit Benjamin Netanyahu tha të dielën vonë se ka rënë dakord për një rihapje të kufizuar të kalimit kufitar Rafah si pjesë e planit të paqes prej 20 pikash të presidentit të SHBA-së, Donald Trump për Gazën, transmeton Anadolu.

"Si pjesë e planit 20 pikash të presidentit Trump, Izraeli ka rënë dakord për një rihapje të kufizuar të kalimit kufitar Rafah vetëm për kalim këmbësorësh, në varësi të një mekanizmi të plotë inspektimi izraelit. Rihapja e kalimit ishte e kushtëzuar me kthimin e të gjithë pengjeve të gjallë dhe një përpjekje 100 për qind nga Hamasi për të gjetur dhe kthyer të gjithë pengjet e ndjera", shkroi Zyra e Netanyahut në platformën e kompanisë amerikane të mediave sociale X.

Ajo vuri në dukje se Izraeli do ta hapë kalimin sapo të përfundojë operacioni i kërkimit për trupin e ushtarit izraelit Ran Gvili.

Izraeli e ka mbyllur plotësisht anën palestineze të kalimit të Rafahut që nga maji i vitit 2024, si pjesë e ofensivës së tij dyvjeçare në Rripin e Gazës, e cila ka vrarë më shumë se 71.400 palestinezë, kryesisht gra dhe fëmijë, që nga tetori i vitit 2023.

Në muajt e fundit, ai e ka lidhur rihapjen e anës palestineze me kthimin e trupit të pengut të tij të fundit nga Gaza.

Kalimi i Rafahut që lidh Gazën dhe Egjiptin, ishte planifikuar të rihapej në tetor sipas fazës së parë të një marrëveshjeje armëpushimi që hyri në fuqi më 10 tetor, por Izraeli nuk e zbatoi.

Që nga faza e parë e armëpushimit, fraksionet palestineze kanë liruar 20 pengje izraelitë të gjallë dhe kanë kthyer eshtrat e 27 të tjerëve. Trupi i Gvilit mbetet i pazbuluar.

Që nga hyrja në fuqi e marrëveshjes së armëpushimit, ushtria izraelite ka kryer qindra shkelje, duke vrarë të paktën 484 palestinezë dhe duke plagosur 1.321 të tjerë, sipas Ministrisë së Shëndetësisë.