Izraeli mban eshtrat e rreth 1.700 palestinezëve për shkëmbime të mundshme në të ardhmen

Izraeli po mban trupat e rreth 1.700 palestinezëve për përdorim të mundshëm në shkëmbime të ardhshme, pavarësisht se nuk ka robër izraelitë që mbahen nga Hamasi, raportoi të hënën e përditshmja "Haaretz", transmeton Anadolu.

Shifra u ngrit gjatë diskutimeve të fundit brenda institucionit të sigurisë së Izraelit, tha gazeta duke cituar dy burime të paidentifikuara të njohura me çështjen. Shefi i "Shin Bet", David Zini, mbështet mbajtjen e trupave në rast se izraelitët merren robër ose zhduken në të ardhmen, një qëndrim i mbështetur edhe nga ushtria izraelite, sipas raportit.

"Haaretz" tha se shumica e trupave u përkasin palestinezëve nga Rripi i Gazës që morën pjesë në sulmin e 7 tetorit 2023 ndaj Izraelit ose në luftimet pasuese. Megjithatë, disa u përkasin palestinezëve që nuk ishin të përfshirë në luftime, tha gazeta.

Burime ligjore të cituara nga "Haaretz" vunë në dyshim autoritetin e Izraelit për të mbajtur trupat, duke thënë se shtetit i mungon fuqia për të mbajtur mbetjet e palestinezëve pa përfshirje të provuar në luftime, përveç nëse Kabineti i Sigurisë përcakton më parë një politikë për këtë çështje.

Në tetor 2025, Fushata Kombëtare Palestineze për Rikthimin e Trupave të Dëshmorëve dhe Zbulimin e Fatit të të Zhdukurve tha se Izraeli po mbante rreth 1.500 trupa palestinezë nga Gaza në objektin ushtarak "Sde Teiman" në jug të Izraelit.

Ushtria izraelite vazhdon të shënjestrojë palestinezët në disa zona të Rripit të Gazës pavarësisht një armëpushimi Izrael-Hamas që hyri në fuqi më 10 tetor 2025, duke vrarë të paktën 1.258 palestinezë dhe duke plagosur 4.139 të tjerë, sipas Ministrisë së Shëndetësisë së Gazës.​​​​​​​​

​​​​​​​​​Izraeli ka vrarë mbi 73 mijë palestinezë dhe ka plagosur mbi 174 mijë të tjerë në një luftë gjenocidale që nga tetori 2023. Lufta ka shkaktuar gjithashtu shkatërrime të gjera, duke prekur 90 për qind të infrastrukturës së enklavës.